Ang pagtugyan sa tanan ngadto sa Ginoo

“Itugyan sa Ginoo ang imong mga kabalaka, kay tabangan ka niya. Dili niya pasagdan ang mga matarong hangtod sa kahangtoran.” (PSALMS 55:22)

Kini nga Salmo nagtudlo kanato sa pagtagbo sa mga kalisod kung moabot kini kanato, ilabina kung ang atong mga suud ug sinaligan nga higala mounay sa pagluib kanato, hinungdan sa atong kasakit. Ang atong katilingban nagkayamukat ug ang atong mga suud usahay impluensiyahan ug mahimong mosumbalik kanato pinaagi sa paghimo ug daotan.

PAGTUGYAN SA KABALAKA. Itugyan nato ang tibuok natong kinabuhi sa Ginoo dili sa pamahala. Mosalig  kita kaniya ug tabangan ka niya. Sa mubong pagkaistorya: ihatag sa Dios alang sa iyang paghukom tanan ug molabay ra kini. (PSALMS 37:5)

Sa tanan nato nga nagatahod sa Ginoo ug nagatuman sa Dios, angay kitang mosalig kaniya bisan pa ug ang atong kinabuhi sa matag adlaw puno sa kadulom o kangitngit ug wala gayoy makita nga kahayag o paglaom. (ISAIAH 50:11)

Ang tanang butang nga atong gikabalak-an sa matag adlaw atong itugyan sa Dios kay siya usab adunay kabalaka kanato. (1 PETER 5:7)

PAGDAWAT SA PAGLIG-ON. Bantayan kita sa Dios kung magmatinumanon kita kaniya. Walay usa ka tawo nga magmadaogon pinaagi sa iyang kaugalingong katakos. (1 SAMUEL 2:9).

Ang Ginoo nga atong Dios ug manluluwas nagatabang pagpas-an sa atong mga suliran. (PSALM 68: 19)

Pinaagi sa atong pagtuo sa Dios, panalipdan kita niya sa iyang gahom samtang naghulat kita sa kaluwasan nga giandam nang daan niya nga ipadayag: buot ipasabot, ang kinabuhi nga walay kataposan nga gitagana nganhi kanato. sa kataposang adlaw. (1 PETER 1:5)

Ang walay undang nga pag-ampo ug paglahutay sa pagtoo mao ra gayod ang anaa alang sa mga Kristohanon. Dili mobiya ang Dios sa matarong niyang katawhan. Itugyan lamang nato ang tanan natong mga plano ug pagabuhaton. Dili kita angay nga maguol ug mabalaka pag-ayo. Mosalig kita sa Dios ug dayegon siya kanunay kay siya ang Manluluwas ug atong Dios (PSALMS 43:5). Dili kita mabalaka sa bisan unsa, pangayoon hinuon nato sa Dios ang atong mga gikinahanglan pinaagi sa pag-ampo nga may pagpasalamat (PHILIPPIANS 4:6).
AMEN.