Pagdawat sa pagpanudlo ug pagpanudlo usab ngadto sa uban

“Ug ang mga butang nga imong nadungog gikan kanako sa atubangan sa daghang mga saksi, kinahanglan ipiyal mo kini ngadto sa kasaligan nga mga tawo nga may katakus sa pagpanudlo sa uban usab.” (2 Timothy  2:2)

Gisulti ni Pablo ngadto ni Timoteo nga ipiyal niya ang natun-ang ebanghelyo gikan sa apostol ngadto sa mga matinud-anon ug kasaligang mga tawo nga adunay kahibalo sa pagpalabang sa istorya ug papanudlo. Ang kalampusan unya niini anaa sa pagdihog sa Diyos kanila.

UNANG IKINABUHI SA GIWALI NIMO NGADTO SA UBAN. Sundon ang mga panig-ingnan sa matuod nga mga pagtulon-an nga gipangtudlo ngadto sa kaugalingon gikan sa ubang magtutudlo ug magpabilin diha sa pagtuo ug gugma nga nadawat tungod sa pagkahiusa diha kang Cristo Jesus. (2 TIMOTHY 1:13)

Magpabilin diha sa mga kamatuoran nga nadawat ug gipangtudlo gikan sa mga nahauna ug hugot nga tuohan kay nailhan man ang nagtudlo nga usa usab ka matinud-anong Kristohanon. (2 Timothy 3:14)

SUNOD NGA ISANGYAW ANG NADUNGOG GIKAN SA UBAN. Tudloan ang ubang magtotoo sa pagtuman sa tanan nga gisugo ni Kristo kanato. Ug atong hinumdoman nga ang atong Ginoo mag-uban kanato sa kanunay hangtod sa kataposan sa kalibotan. (MATTHEW 28:20)

,

Dawaton ug tahuron ang gisugo sa mga nahauna kanato ug gamiton ang ilang mga pagdasig alang sa atong kaugalingong pagpakigbisog diha sa tinuoray nga pakig-away. (1 TIMOTHY 1:18)

Kung naghulat kita ug bunga, kinahanglan maghago kita ug buhaton ang kabubut-on sa Diyos ayha nato madawat ang iyang mga saad. Niini, gikinahanglan usab ang pailob ug pag-ampo alang sa uban nga hatagan sila sa Ginoo sa maayong panabot sa tanang butang ug kita nga nahamtong ug una sa pagtoo, mudasig ug mohikap sa ilang kinabuhi aron masayod usab sila ug mohinuklog sa ilang nadungog nga mga pagwali ug nabasahan gikan sa pulong sa Diyos. Kinahanglan usab nato nga makig-ambit sa mga pag-antos ingon nga maayong sundalo ni Cristo Jesus (2 timothy 2:3). AMEN

Michael M. Medina, WCM        The Light of Christ Ministry    September 30, 2017

Ang nakasala sa sala nga wala buhata

“Busa ang tawo nga nasayod unsay maayo nga buhaton apan wala magbuhat niini, nakasala” (James 4:17)  

Kung kita adunay kasayuran sa angay buhaton nga uyon sa kabubut-on sa Dios ug kini atong nabasa sa iyang pulong apan wala nato buhata, kini alang kanato usa ka dako-dako nga sala tungod kay kita nagbinurong sa paghimo unsay maayo ug mas gipalabi pa nato ang paghimo sa daotan.

ADUNA KITAY KASAYURAN APAN NAPAKYAS SA PAGHIMO. Sama kini sa sulugoon nga nasayod unsa ang buot ipabuhat kaniya sa iyang agalon apan wala mag-andam ug wala magtuman sa gipabuhat hinungdan nga latoson gayod siya sa makadaghan. (LUKE 12:47)

Kung nasayod kita sa atong tinguha sa dugang lamdag ug kahibalo bahin ni Ginoong Hesukristo, anaa pa kitay purohan nga mapasaylo ug makabaton ug paglaom. Sama kini sa giingon ni Pablo sa 1 Timothy 1:13 bahin sa iyang kaugalingon: “Kaniadto ako siyang gipasipad-an, gilutos ug gibugalbugalan apan ang Dios naluoy kanako kay dili pa man ako magtutuo ug wala ako masayod sa akong gibuhat.”   Apan kung nagtoo kita ug moingon nga maalamon na gyod kita ug nahibalo sa tanan, ug wala na nagkinahanglan ug dugang lamdag, sa atong pagkagahi ug ulo kita lamang usab ang nagsira sa atong mga mata sa kamatuoran ug ang atong sala nagapabilin kanato. Nagpabilin kita nga walay pagtoo ni Ginoong Hesukristo ug tungod niini nakasala kita sa Espirito Santo—usa ka sala nga dili mapasaylo. “ Si Jesus mitubag, “Kon buta pa kamo, wala unta kamoy sala. Apan kay nag-ingon man kamo nga makakita kamo, sa ato pa, sad-an kamo.” (John 9:40)

Ang pagka-ignorante sa usa ka tawo bahin kang Ginoong Hesukristo dili mahimong ipamalibad tungod kay miabot Siya dinhi sa kalibutan ug gisangyaw lukop tanang lugar. Kung wala pa, pwede tingali mangaliyupo sa pagkaburong bahin Kaniya ug sa buhing Dios. Uban niining maong pagka-ignorante mao ang pagka-walay pagtoo ug pagpadayon sa pagbuhat sa daotan. “Dili unta sila makasala kon wala pa ako moanhi ug mosulti kanila. Apan karon dili na sila makaingon nga wala silay sala.” (JOHN 15:22)

ADUNA KITAY KASAYURAN APAN NAPAKYAS SA PAGTOO.

Mas may paglaom pa ang labing buang nga tawo kay kaniya nga naghunahuna nga siya maalamon bisag dili tinuod (PROVERBS 26:12)

Pagkaalaot sa tawo ng nagdumili sa pagtoo ni Ginoong Hesukrito kay sumala sa kasulatan ang mga milagro nga nahimo ug nakita nila, nahimo ug nakita usab sa uban ug mas abtik pa sila sa pag-amgo ug naghinulsol sa ilang mga sala (MATTHEW 11:21).

Sukad nabuhat sa Dios ang kalibotan tin-aw kaayo nga nakita diha sa mga butang nga gibuhat sa Dios ang iyang dili makita nga mga kinaiya nga mao ang iyang gahom nga walay kataposan ug ang iyang pagka-Dios. Busa wala nay ikapangatarongan kadtong dili gayod motoo Kaniya (romans 1:20)

Ang pagkahibalo sa  kabubut-on sa Dios dili maghatag kanato ug dugang kabulahanan sa kinabuhi kung ang atoang kinabuhi dili manubag niini ug mas mobug-at pa hinoon ang timbang sa atoang mga sala kay anaay angay pagabuhaton apan wala nato buhata ug ang gibuhat ang sala hinoon, kini usa criminal nga sala ug adunay dakong silot nga gahulat. AMEN 

Pagtipig ug mga bahandi sa langit

“Ayaw kamo pagtigom ug mga bahandi alang sa inyong kaugalingon dinhi sa yuta kay tay-an lamang kini ug kutkuton sa anay o kawaton usab sa mga kawatan. Pagtigom hinuon ug mga bahandi alang sa inyong kaugalingon didto sa langit diin walay taya ug anay nga makakutkot niini ug walay mga kawatan nga makakawat niini kay hain gani ang inyong bahandi atua usab didto ang inyong kasingkasing.” (Matthew 6:19-21)

Kawad-on ug pagka walay klaro ang mahitabo kung ang atong pangandoy mao ang kalibotanong mga bahandi. Itukod hinoon nato ang atong kalipay sa mas klaro nga pundasyon diin walay pagkataya ug pagkawala ang mahitabo sa atong matigom nga bahandi tungod sa malahutayong gahom ug gugma ni Kristo.

PAGTIGOM UG BAHANDI ALANG SA KAUGALINGON. Adunay mga tawo nga nakadungog sa mensahe sa Dios apan ang mga kabalaka bahin niining kinabuhia ug ang gugma alang sa mga bahandi ang mipatigbabaw kay sa mensahe sa ebanghelyo hinungdan nga dili makabunga ang binhi nga pulong sa Dios nga gipugas sa iyang mga alagad. Sama kini sa mga binhi nga nahulog sa dapit sa mga tunokon nga sagbot (MATTHEW 13:22).

Ang tawo usahay moingon sa iyang kaugalingon nga magtigum siya ug daghang abot ug mga kabtangan ug maghunahuna nga anaa na niya ang tanang mga butang nga iyang gikinahanglan alang sa daghang katuigan ug magtoo siya nga magpahayahay na lang siya pinaagi sa pagkaon, inom ug paglipay. Unya sa kalit lang mamatay siya ug wala mahibaloi kinsay makapanag-iya sa tanang butang nga iyang gitigom alang sa iyang kaugalingon (LUKAS 12:20).

Ang pagpanigom ug bahandi (bulawan o salapi) mahimong katayaan ug kining maong taya mahimo pang saksi batok kanato ug sama sa kalayo magakutkot sa atong lawas. Ang atong pagtigom ug mga bahandi wala na mahaom kay ania na kita sa kataposang mga adlaw (SANTIAGO 5:3).

PAGTIGOM UG BAHANDI SA LANGIT. Mas maanindot ang pagbaton ug igo lamang nga katigayonan, paghatag ngadto sa mga nanginahanglan o mga kabos uban ang pagtugyan sa kaugalingon alang sa pag-alagad ni Kristo. Niini, kita mahingpit, sama sa gisugo ni Hesus niadtong batan-on nga dato, “lakaw ug ibaligya ang tanan mong katigayonan. Ihatag ang halin ngadto sa mga kabos ug makabaton kag mga bahandi didto sa langit. Unya balik nganhi ug sunod kanako” (MATTHEW 19:21).

Ania ang pasalig sa atong Ginoo: Dili kita angay nga mahadlok o mabalaka kay ang atong Dios Amahan nahimuot sa paghatag kanato sa tanan. Kinahanglan lamang nga magsangkap kitag mga puntil nga dili madunot ug magtigom ug mga bahandi didto sa langit kay kung hain gani ang atong bahandi atua usab didto ang atong kasingkasing (LUKAS 12:32)

Padayon nato nga ibutang atong paglaom diha kang Ginooong Hesukristo, usa ka paglaom nga dili matarog uban ang  panulondon nga dili madunot o mahugaw o mahanaw. Busa padayon kita sa pagkalipay bisan tuod sa mga pag-antos karon uban sa daghang mga pagsulay (1 PETER 1:3-6).

Ang insakto ug tarong nga kinaiya sa bahandi maoy magtudlo kanato sa tinuod nga espirituhanon mga hiyas. Atong timan-an nga ang materialismo mag-ulipon lamang sa atong panghunahuna ug kabubut-on kung palabihon nato ang kalibutanon kaysa langitnong mga bahandi. AMEN.